F 24
[1] FEDO -as, deturpare; unde verbalia et fedus -a -um, idest turpis, et comparatur -dior -simus, unde fede -dius -sime adverbium et hec feditas -tis et fedosus -a -um, idest fedus, et similiter comparatur. [2] Item a fedus -a -um hoc fedus -eris, idest pactum, pax que fit inter dimicantes. Fuit olim consuetudo quod cum aliqui vellent inire fedus quedam porca sacrifìcaretur in hunc modum: maior ex ista parte et maior ex illa, sive esset imperator sive rex sive alius princeps, tenebant porcam illam et illam percutiebant et turpiter occidebant, quasi sic occidatur ille qui a pace resilierit, et inde dictum est fedus a porca fede et turpiter occisa cuius mors optabatur ei qui a pace resiliret; unde invenitur 'ictum fedus inter eos'; hinc Dominus 'percutiam fedus inter me' et cetera. [3] Vel dicitur fedus a fide; vel dicitur ab hyrco et edo, f littera addita vel potius posita pro h que habetur pro hoc nomine hyrcus, et dicitur fedus sic quia hircus et edus cum porca immolabantur in federe faciendo. [4] Et fedus prevenit pacem; sed federis partes sunt indutie diete, quasi in dies otia vel quasi inducta otia, sicut supra dictum est; [5] unde hic et hec fetialis et hoc -le, quasi fedialis, idest sacerdos per quem federa fìebant vel qui bella annuntiabat, qui potius dicebatur secularis, unde olim fetiales vocabantur fediales quia per eos federa fìebant sicut per seculares bella; fetialis ergo proprie dicebatur ille qui legatione utebatur pro federe et pace. [6] Item a fedus federo -as, idest pacificare, fedus firmare, et componitur confedero -as, coniungere, colligare, unde verbalia, et confedustus -a -um, eodem federe cum alio coniunctus, scilicet collateralis, socius, consors, commanipularius, consodalis, confida, comes, collega, consocius, contubernio, combinarius, convictuarius, collaterensis. [7] Item a fedo hec fex -cis, vel potius derivabitur postea a figo. [8] Item a fedo fedeo -des et, mutata d in t, dicitur feteo -es -ui, idest esse vel fieri fetidum; quod autem dicitur fetet quasi fos tenet, idest ignem vel aerem, ethimologia est. [9] Et hinc hic fetor -ris, unde fetidus -a -um, et fetosus -a -um, idest fetidus; et per compositionem fetulentus -a -um, idest plenus fetore et comparatur, unde hec fetulentia -e, idest feditas. [10] Fedo componitur confedo -as, idest simul fedare; defedo -as, idest mundare vel valde fedare; diffedo -as, idest diversis modis fedare vel mundare; effedo -as, idest valde fedare vel extra feditatem ponere; refedo -as, idest iterum fedare. [11] Fedo et composita ab eo activa sunt et producunt hanc sillabam fe. Feteo vero cum omnibus suis compositis, si qua habet, neutrum est et corripit primam sillabam, scilicet fe.
Colonna con sottomenu di navigazione
