X 4
[1] XENOS, idest peregrinum; et xenos idest sensus; a xenos quod est peregrinum, hoc xenium, munus parvum et quodcumque munus mittitur alicui, quod vulgo dicitur presentatorium, et componitur hoc exenium pro eodem. [2] Item a xenos hoc xenodochium, locus in quo pauperes et peregrini suscipiuntur et conversantur, ut hospitale, vel ipsa collectio pauperum et peregrinorum, unde hoc xenodochiolum diminutivum, et hic xenodochiarius, et hec xenodochiaria, idest xenodochii custos. [3] Xenos, idest sensus, componitur Ulixes, sed hoc supra distinctum est, et etiam xenotrophium determinatum superius est.