U 18
[1] VERRO -ris verri -risti versum, idest trahere vel tergere, purgare, radere, scopare, unde hoc verriculum diminutivum, quo domus purgatur, vel quoddam genus retis vel navis piscatorie; [2] et hec verruca -ce, pustula carnem superexcedens, que et porrum dicitur, et ponitur quandoque pro quodam vehiculo; unde verrucosus -a -um, idest verrucis plenus, tuberosus vel inequalis, incomptus, Persius 'sunt quos Pacuvius et verrucosa moretur'. [3] Item a verro hic vermis: et sunt vermes aut terre ut scorpio, cantarida et similes, aut aque ut sanguisuga, aut aeris ut aranea, aut frondium ut eruca, aut lignorum ut teredo, aut vestimentorum ut tinea, [4] aut carnium ut emigraneus, lumbricus, ascaride, costi, pediculi, pulices, lendes, tarmus, ricinus, uria, cimex. [5] Et dicitur vermis a verrendo, quia non ut serpens apertis passibus vel squamarum nisibus repit, quia non est illi spine rigor, sed indirectum corpusculi sui partes gradatim porrigendo contractas, contrahendo porrectas motum explicat, sicque agitatus verrendo prolabitur; vel dicitur vermis quasi vernis, quia in vere exeat. [6] Unde hic vermiculus diminutivum, unde vermiculosus -a -um, et comparatur; et vermiculo -as, scaturire ad modum vermium, effervere, et hoc vermiculum. [7] Item a verro verrito -as et verso -as frequentativa; verro componitur converro -ris, everro, extra vertere, eicere; et est activum cum suis compositis, et facit preteritum in -ri et supinum in -sum.