S 223
[1] SCABO -is -bitum, gratare, unde scaber -a -um, et scabrosus -a -um, et scabidus -a -um, idest asper, tiniosus, unde scabidulus diminutivum, aliquantulum scabidus. [2] Item a scabo scabreus -a -um, idest asper vel vetustus et etate plenus, decrepitus; et inde scabreolus -a -um diminutivum, et hec scabritudo -is, idest asperitas corporis. [3] Item a scabo hec scabies -ei, et hec scabia -e: et est scabia sicut lepra, asperitas cutis cum pruritu et squamatione, sed scabies tenuis asperitas et squamatio, unde et dicitur scabies quasi squamies et est ethimologia; unde hec scabiecula -e, et hec scabiola, et scabiosus -a -um, et comparatur. [4] Item a scabo hec scobs -bis, ferrum quo ligna planantur vel purgamentum domus; Oratius (sat. 2, 4, 81-82) 'in scobe quantus consistit sumptus', unde scobo -is -bi -tum, idest mundare et proprie domum. [5] Et mutatur b in p et dicitur scopo -is, ut in Psalterio 'scopebam spiritum meum'; [6] unde hec scopa -e, quedam arbuscula, et scopa illud cum quo purgatur domus, et fìt sepe ex scopa arbore; Oratius in Sermonibus 'vilibus in scopis et mappis', et in Evangelio 'invenit eam scopis mundatam et ornatam'; unde hec scopula -e diminutivum, et hinc scopulosus -a -um, scopulis plenus, et scoposus -a -um. [7] Item a scopa scopeus -a -um, de scopa existens, et scopinus -a -um, et hoc scopetum, locus ubi scope abundant, et scopo -as, idest purgare vel verberare. [8] Item a scabo squaleo -es -ui, sordere, esse vel fieri squalidum vel asperum, vel splendere, unde squalesco -is inchoativum, et squalidus -a -um, asper, sordidus, et comparatur; unde squalidulus -a -um, aliquantulum squalidus, et hec squaliditas. Item a squaleo hic squalor -ris, asperitas, pollutio, sordidatio. [9] Et hec squama -e piscium et serpentium et lorice; unde squamatus -a -um, squamis abundans, et hec squamata -e, lorica ferrea ex laminis ferreis vel eneis concatenata ad modum squame piscis, et ex ipso splendore squamarum et similitudine dieta. [10] Item a squama squamo -as, squamas auferre vel dare, et componitur desquamo -as, disquamo -as, exquamo -as, omnia pro auferre squamas, et producunt hanc sillabam scilicet squa-, et sunt neutra. [11] Item a squama hec squamula -e diminutivum, et hic squatus, quidam piscis, quia sit squamis acutis, unde et eius cute lignum politur; et squameus -a -um et squamosus -a -um, plenus squamis et lucidus vel asper, et squamosus comparatur; unde hec squamositas -tis. [12] Item a squalor vel squama squarrosus -a -um, idest asper vel inequalis, et dicitur squarrosus quasi squalore vel squamis plenus, corrosus; Ennius 'squarrosa rostra'. Et est squaleo neutrum cum suis compositis, si qua habet, et caret supino et producit hanc sillabam squa-, Item scabo activum est cum suis compositis, si qua habet, et in presenti corripit hanc sillabam sca-, sed in preterito eam producit.