P 65
[1] PEON quidam medicus fuit, a quo peonia herba perhibetur inventa; hanc quidam glesiden vocant, quia dulcis saporis sit, vel penterobinam a numero granorum, vel, ut alii, dactilos ad similitudinem digitorum. [2] Item Peon fuit auctor, a quo quidam pes ab eo inventus dictus est peon, et constat ex IIII sillabis quilibet peon; [3] sunt enim IIII peones, et sunt contrarii epitritis: peon primus constat ex prima longa et tribus brevibus, peon secundus ex secunda longa et ceteris brevibus, peon tertius ex tertia longa et ceteris brevibus, peon quartus ex quarta longa et precedentibus brevibus; [4] unde peonius -a -um et peonicus -a -um.