O 20
[1] OLON grece, latine dicitur totum; unde hic olor -ris, quedam avis, scilicet cignus, quia totus plumis sit albus; unde Ovidius Epistularum 'ad vada Menandri concinit albus olor'; et inde olorinus -a -um. [2] Olon componitur cum caustos, quod est incensum, et dicitur hoc olocaustum, idest sacrificium quod olim fiebat de animalibus brutis, quasi totum incensum, quia totum incendebatur et comburebatur quod non comedebatur; [3] unde hoc olocaustoma -tis, idem vel sacrificium quod fiebat pro mortuis. [4] Item componitur cum phos, quod est lux vel ignis, et dicitur hic Olimpus -pi, quidam mons, quasi olonphos, idest totus lucens, quia est quasi celum altitudine sua, unde et sepe pro celo ponitur. [5] Unde olimpius -a -um et olimpicus -a -um et hoc Olimpum, idem mons, vel Olimpium, [6] et hec olimpica -ce et hec olimpias -dis in eodem sensu: festum vel solemnis ludus quod vel qui fìebat ad honorem Iovis semel per quinquennium ne, si ulterius protenderetur, in negligentiam et oblivionem corrueret, vel si citra quinquennium celebraretur, expense nimietas eos gravaret. [7] In illa celebratione lex talis erat quod quicumque victor existeret ibi in aliquo ludo haberet quodcumque munus vellet requirere; [8] unde invenitur in Rethorica 'quicumque tyrannum interfìciet olimpicarum premium accipito'; et hinc olimpiacus -a -um. [9] Item componitur cum sericum et dicitur olosericus -a -um, idest totus ex serico, unde hec oloserica -ce, quedam vestis tota ex serico, [10] sicut olofarus -a -um, totus ex purpura, unde hec olofara -e, quedam vestis tota ex purpura. [11] Item componitur cum graphia, quod est scriptura, et dicitur hoc olographum, idest testamentum manu auctoris totum scriptum. [12] Item componitur cum xenos, quod est peregrinus vel sensus, et dicitur hic Ulixes -is, quasi olon xenos, idest totus in sensu vel totus sensatus, vel quasi peregrinus omnium. [13] Iste designat sapientem qui in hoc mundo conversatur tamquam peregrinus: non enim hic habemus manentem civitatem, sed futuram inquirimus'. [14] Ulixes tamen multum peregrinatus est in vita sua. Et nota quod Ulixes facit vocativum Ulixes vel Ulixe. [15] Item invenitur hic Ulixeus -ei pro Ulixe, et ulixeus -a -um possessivum; sed ulixeus possessivum est tetrasillabum, sed Ulixeus proprium est trisillabum quia -euin nominativo diptongus est; [16] genitivus tamen est par in sillabis possessivo, quia -ei non est ibi diptongus. [17] Item componitur cum carpos, quod est fructus, et dicitur hoc olocarpamen, idest totus fructus.
Colonna con sottomenu di navigazione
