L
L 1
[1] LABO -as, idest titubare, vacillare, tremere, labi, unde labasco -scis inchoativum, unde Terentius in Eunucho (178) 'labascit victus uno verbo'. [2] Et labor -eris lapsus, unde lapsus -sus, et hec lapsio, et lapso -as frequentativum, et raro invenitur in deponenti genere lapsor -aris, et lapsim adverbium, et hic et hec labilis -le, labiliter. Labile dicitur quod facile labitur, vel in quo quis facile labitur. [3] Et hic labeo -nis, tabernarius vel leccator, et Labeo fuit quidam legis peritus et quidam vilis poeta, unde Persius 'nec michi Polidamas et Troades Labeonem pretulerunt'. [4] Item a labor hec labina, terra aquosa et mobilis et labilis, in qua quis facile labitur, et lubricus -a -um, labilis: proprie lubricum est illud quod quanto magis tenetur, tanto magis labitur, ut anguilla; et etiam illud dicitur lubricum, in quo quis labitur, ut via lutosa et aquosa, et glacies, unde illud 'fiant vie illorum tenebre et lubricum'. [5] Et hinc lubrico -as, idest labi, vacillare: Prudentius in Sicomachia 'lubricat incertus dubia sub ymagine visus'. Et lumbricus -ci, vermis intestinorum et terre, quasi lubricus quia labitur vel quia in lumbis sit, unde lumbricosus -a -um, plenus lumbricis. [6] Item a labor hic laberintus, scilicet perplexum edificium quale est apud Cretam a Dedalo factum. Et, ut dicunt, quatuor fuerunt laberinti: primus egiptius, secundus creticus, tertius in Lemno, quartus in Italia; omnes ita constructi ut dissolvere eos vix secula possint. Et dicitur laberintus, quia nemo inde labi possit, vel quia erratilis est, ad labendum facilis. Vel dicitur laberintus a labor -oris et intus, quia intus habeat laborem. [7] Item a labor labes -bis, idest putredo, pernicies, mina, miseria, unde hec labecula -e diminutivum. Et componitur cum facio et dicitur labefacio -cis, idest maculare, et labefio -is, idest maculari, que possunt esse composita a labi vel labare. [8] Item a labor hoc labarum, signum bellicum, quod ex auro et lapidibus pretiosis in vexillum sancte Crucis transformatum est. Inter alia bellica signa erat pretiosius, quod imperator et consules adorabant: hocs Constantinus iussit fieri. [9] Labare vel labi componitur cum facio et fio et dicitur labefacio, idest convellere, concutere, ferire, facere labare vel labi; labefio -is, idest labare vel labi. Et a labefacio labefacto -as frequentativum, unde Persius 'elisasque nates labefactent forcipe adunca'. Et labefacto potest esse frequentativum huius verbi labefio. [10] Labor componitur allabor -eris, idest iuxta labi vel ad; collabor, idest simul labi; dilabor -eris, idest diversis modis vel in diversas partes labi; delabor -eris, idest de uno loco ad alium vel deorsum labi; elabor -eris, idest valde et extra labi, evadere; illabor -eris, idest labi in; [11] prolabor -eris, idest procul vel ab anteriori sive in anteriorem pattern labi; perlabor -eris, idest perfecte labi; prelabor -eris, idest ante vel iuxta labi; relabor -eris, idest iterum vel retro labi; sublabor -eris, idest subtus labi. [12] Labor -eris cum omnibus suis compositis est deponens et facit supinum in -psum et producit hanc sillabam la-. Labo -as cum omnibus suis compositis, si qua habet, neutrum est et corripit la-.
Colonna con sottomenu di navigazione
