U 27
[1] VIGILO -as, a somno abstinere, vacare, studere, unde vigilans, et comparatur, unde hec vigilantia; [2] item a vigilo hic et hec vigil -is, qui vigilat, et proprie causa custodie, unde hoc vigilium, et hec vigilia -e in eodem sensu, scilicet vigilatio, vel ipsi vigiles, et hora vigilibus distincta ad vigilandum; vigilia etiam dicitur dies profestus, scilicet dies primus ante festum, quia tunc in sero vigilie vacamus quandoque. [3] Vigil componitur pervigil, idest valde vigil, unde hoc pervigilium, idest vigilatio, Martianus (1, 2 p. 2, 15-16) 'yemali pervigilio marcescentes. [4] Item a vigilo hic et hec et hoc vigilax -cis, ad vigilandum paratus, qui sepe vigilat et multum, vel vigilare potest, Sidonius (epist. 8, 11, 6): in paginis eius 'vigilax' lector inveniet; [5] vigilo componitur advigilo -as, valde vigilare, convigilo -as, devigilo -as, evigilo -as, in eodem sensu ista duo, idest valde vigilare et a somno excitari vel excitare, [6] invigilo -as, insistere, vacare, operam dare, pervigilo -as, revigilo -as. Vigilo et eius composita neutra sunt, preter devigilo et evigilo pro a somno excitare, que sunt activa.
Colonna con sottomenu di navigazione
