P 115
[1] POST, adverbium loci, licet quandoque ponatur in vi temporis, [2] et comparatur posterior, postremus, sed postremus de multis, posterior de duobus dicitur; [3] unde posterius, postremo adverbia, et hec postremitas -tis; et postremus quandoque accipitur in vi positivi et comparatur -mior -simus, [4] unde postreme -ius -sime adverbium; et a posterior dicuntur posteriora, scilicet podex, quia retro sunt et a vultu aversa, ne, dum Illa purgamus, inquinaremur aspectu. [5] Item a post hec pupis, posterior pars navis, quasi post posita, et ponitur sepe pro ipsa navi. [6] Item a post posterus -a -um, sequens; unde hec posteritas, progenies vel propagatio filiorum in nepotes vel nepotum in pronepotes, nam posteritas a nepote incipit, quasi postera etas; [7] et componitur preposterus -a -um, transversus, non rectus, non recto ordine dispositus, quando qui debet esse posterior factus est prior; [8] unde prepostero -as, idest ordinem pervertere vel transvertere, quod debet esse posterius facere primum. [9] Item a post hic postis -is, latens ingressus a parte posteriori, [10] et idem hec postica -ce, media sillaba correpta, et idem hoc posticum -ci; Oratius (epist. 1, 5, 31) 'atria servantem postico falle clientem'; [11] et hoc posticium pro eodem in Daniele 'irruerunt famuli per posticium'. [12] Item a postis hic posticulus et hic postellus et hec posterula -e, omnia diminutiva. [13] Item a post posticus -a -um, idest ulterior vel a posteriori factus; Persius 'occipiti ceso postice occurrite sanne'; [14] et postea adverbium temporis vel ordinis, [15] et componitur posteaquam, idest postquam, et postealoci, idest post illum locum vel post illud tempus. [16] Item post componitur postquam; [17] et cum telon, quod est longum, et dicitur hec postela, corrigia que sub cauda equi tenditur, sicut antela dicitur que ante tenditur, [18] vel dicitur postela quasi post sellam et antela quasi ante sellam, et secundum hoc potest dici sic quodlibet ornamentum equi ante vel retro, vel mantica que ante portatur vel retro. [19] Item post componitur postheri, idest hodie, postridie, idest post tres dies, postpridie, idest hodie, et componitur quoque cum multis aliis partibus, de quibus melius per se tractatur.
Colonna con sottomenu di navigazione
