R 41
[1] RODO -is -si -sum, unde hic rosor, et hinc rosorius -a -um, corrosorius vel reprehensorius, et hoc rosorium, ubi roditur aliquid. [2] Item a rodo rosim adverbium, idest mordaciter, [3] et hoc rostrum dicitur, et avium et gratia similitudinis navium, et rostrum etiam dicitur forum ubi tractabantur cause romane, quia devictis Antonio et Cleopatra Augustus de rostris navium eorum fecit fieri sedes in foro causarum; [4] unde rostellum diminutivum; et componitur hoc prorostrum, idem quod rostrum, quia in anteriori parte est. [5] Item a rostro rostratus -a -um, rostro armatus. [6] Item a rodo hec rubigo -nis, quasi rodigo quia rodat, vel a rubeo quia faciat aliquid rubere, et est vitium ferri et segetum; [7] unde rubigineus -a -um, de rubigine existens, et rubiginosus, rubigine plenus. [8] Rodo componitur arrodo -is, valde vel iuxta rodere, [9] corrodo -is, simul rodere, circumrodo -is, derodo -is, [10] erodo -is, extra vel valde rodere; unde hec erugo -nis, sanguisuga et vitium rodens ferrum et segetes, et nascitur hec corruptio ex minutissima pluvia circa festum sancti Iohannis, et ponitur sepe pro amore pecunie; et dicitur erugo quasi erodo, quia rodat, vel erugo dicitur ab es -ris et secundum hoc proprie est eris, unde et dicitur erugo quasi eris rubigo sicut ferrugo ferri rubigo; [11] unde erugineus -a -um, de erugine existens, et eruginosus -a -um, erugine plenus. [12] Item ab erugo erugino -as, sicut a rubigo rubigino -as, idest erugine vel rubigine corrumpere, devastare; [13] et componitur erubigino -as et derubigino -as, exerugino -as, deerugino -as, idest rubiginem vel eruginem auferre, et sunt activa. [14] Item ab erodo hec eruca -ce, modicus vermis frondium, quasi eroda quia erodat; et eruca est quedam herba, et tunc dicitur ab uro, quasi uruca quia ignee sit virtutis et in cibo sepe sumpta veneris incendium sepe moveat; [15] perrodo -is. Rodo et eius composita sunt activa et faciunt preteritum in -si et supinum in -sum, et producunt hanc sillabam ro-.
Colonna con sottomenu di navigazione
