N 68
[1] NUNTIO -as, unde hic nuntius et hee nuntia -e, qui vel que nuntiat, et hoc nuntium -tii, quod nuntiatur: confunditur tamen quandoque hee proprietas; [2] et hic nuntiolus et hee nuntiola -e et hoc nuntiolum diminutiva. [3] Et per compositionem hic internuntius et hee internuntia, qui vel que inter duas partes nuntiat vel nuntium portat, et hoc internuntium -ii, quod internuntius nuntiat. [4] Item componitur hic prenuntius et hee prenuntia et hoc prenuntium, [5] et hic annuntius et hee annuntia, idem quod nuntius, et hoc annuntium, quod annuntiatur; Ambrosius Super Egisippum 'irridebant prophetarum annuntia, fas omne calcabant'. [6] Nuntio componitur annuntio -as, denuntio -as, idest valde nuntiare vel prohibere: sed annuntio de futuro, nuntio de longinquo, denuntio in presenti; [7] enuntio -as, idest valde nuntiare vel de aliquo nuntiare, unde enuntiatio et enuntiativus -a -um; [8] prenuntio -as, pronuntio -as, renuntio -as, iterum nuntiare vel renuere, [9] et componitur abrenuntio -as, ab se renuntiando removere, renuere, postponere, et in eodem sensu construitur cum dativo et accusativo; [10] subnuntio -as, latenter vel parum vel post nuntiare; et est activum cum omnibus suis compositis.
Colonna con sottomenu di navigazione
